Il a nîvé, èt on pout dîre qu’on a stî bin sièrvu !
Quand, au matin, dj’a vèyu ci blanke sipècheù-là dissus lès vôyes èt su lès sapins divant m’ tchambe, dj’a sèré mès-ouys èt dji m’a r’vèyu tot gamin.
C’èsteut d’abôrd à l’ novèl an ; i nîveut èt dj’aveu su l’ vôye tote blanke, mès pîds dins mès sabots, po-z-aler pwârter mès sowaîts à m’ pârin, à Bone, aus matantes èt aus mon.nonkes; tote one toûrnéye qwè ! I faleut comincî pa l’ pârin à Bone, ôtrumint èlè n’aureut nin stî continte èt vos l’aurîz bin sintu !
Dji m’a r’vèyu à sclûje. C’èst m’ papa què l’aveut faît ; èt dj’aveu couru èmon l’ mârchau po lès fèrayes ; dès bèlès fèrayes à d’méy rondes, avou dès traus po lès visser. Mi sclûje èsteut basse su pates mins solide. Faleut veùy à quéne vitèsse qu’on d’chindeut li rouwèle d’èmon l’ Tchausse-pîd ou li route dès chômeûrs.
On èsteut dès bindes avou dès sclûjes di totes lès sôrtes. Li djoû d’audjoûrdu, on n’ veut avaurci quausu pus qui dès « luges » d’au botique, avou dès platès fèrayes. Qui v’loz filer avou ça ? Nos alin.n´ dins lès d’chindéyes à plat vinte ou a deûs, onk su l’ôte. Ou trwès, quate siclûjes atèléyes l’one drî l’ôte èt on pirdeut trwès, quate toûrnants à tote vitèsse. On n’ veut pus, ça, nin vêci, todi.
Il èst vraî qu’on n’a pus dès nîves tos l’s-ans. À l’intréye di nosse viyadje, intur li grand-route èt Moûse, i-gn-aveut on pré qu’on loumeut l’ grand-pré ; il aveut pus d’ cint mètes di costé. One anéye, il aveut brâmint ploû à l’âriére-saîson èt Moûse aveut bouté, jusqu’à v’nu lètchî l’ grand-route qu’èsteut saquants mètes pus wôt qui l’ pré. Adon, i s’a mètu à djaler mins divant qui tote l’aîwe si r’ssatche, i-gn-aveut one bèle sipècheû d’ glace dissus l’ grand pré. Cite anéye-là, nos-avans co sôrti nos sclûjes. Mins ç’ côp-ci avou deûs bastons fèrés d’on solide picot d’ fiêr. Èt èvôye dissus l’ glace. Dès-ôtes avint faît dès gliswêres su l’ mitan dè pré qu’èst tot d’foncé come on grand plat.
Èt come li scole n’èsteut nin lon, lès gamins acourint tot timpe su l’ grand pré.
Quand c’èsteut l’eûre, li Maîsse Hubin vineut d’ner on ptit côp d’ chuflèt èt tote li binde coureut è scole. On r’passeut su l’ glace on p’tit côp après li scole. Mins l’ dimègne après l’ dîner, c’èsteut quausu li mitan dè viyadje qu’èsteut su l’ grand pré : lès gamins, lès crapôdes, dès djon.nes, dès vîs ; gn-aveut minme saquants patineûs. Ci n’a nin duré one samwin.ne mins on a yu l’ timps di s’ bin plaîre. I-gn-a co bin onk ou l’ôte qu’î a lèyî sès sabots, ûsés ou bîlés. Mins, di ç’ timps-là, on n’èsteut nin à ça près.
Asteûre, on faît dès « spôrts d’iviêr » dissus des « pistes » avou dès sclûjes corne dès gayoles, en payant bon-z-et tchêr. Au viyadje, n’a pus dès vôyes po-z-aler à sclûje. Èt lès-autos, don vos-ôtes ! I-gn-a co bin one pitite uréye (colline) ou l’ôte ; mins ça c’èst jusse bon po lès tot p’tits.
Po l’s-ôtes, i-gn-a lès spôrts d’iviêr èt i n’ faut pus couru lon, mins faut one boune boûsse.
Di nosse timps …
Texte de R. Fraiture paru dans le journal Vers l’Avenir du 19 février 1985.